روحیل نذیر کا پہلے ٹرائلز میں ناکامی سے قومی انڈر 19 ٹیم کی قیادت تک کا سفر

اسلام آباد سے تعلق رہنے والے وکٹ کیپر بیٹسمین روحیل نذیر آئی سی سی انڈر 19 کرکٹ ورلڈکپ 2020 میں قومی اسکواڈ کی قیادت کریں گے۔

ٹیپ بال سے کرکٹ کا آغاز کرنے والے روحیل نذیر نے اپنے بڑے بھائی طاہر نذیر کو دیکھتے ہوئے کرکٹ کھیلنا شروع کی۔ نوجوان کرکٹر نے کہا کہ اہل خانہ کی اسپورٹ کے باعث انہیں شوق کی تکمیل میں کسی بڑی رکاوٹ کا سامنا نہیں کرنا پڑا تاہم پی سی بی پیپسی انڈر 16کرکٹ پروگرام 2015 میں ٹرائلز کے لیے منتخب نہ ہونے پروہ دلبرداشتہ ہوگئے تھے۔

آئندہ سال ٹرائلز میں کامیابی پر روحیل نذیر کو اسلام آباد انڈر 16 ٹیم میں شامل کرلیا گیا۔ پی سی بی پیپسی انڈر 16 دو روزہ کرکٹ ٹورنامنٹ 2016 کے 4 میچوں میں اسلام آباد انڈر 16 کی جانب سے 394 رنزبنانے پر روحیل نذیر کو 2017 میں آسٹریلیا کے خلاف قومی انڈر 16 کرکٹ ٹیم میں شامل کرلیا گیا۔ متحدہ عرب امارات میں کھیلی گئی سیریز میں بھی وکٹ کیپر بیٹسمین نے شاندار کارکردگی کا تسلسل برقرار رکھا۔

انہوں نے سیریز میں شامل 3 ایک روزہ میچوں میں 2 سنچریوں کی مدد سے 258اور 3 ٹی ٹونٹی میچوں میں ایک نصف سنچری کی بدولت99 رنز اسکور کیے۔انڈر 19انٹرریجنل ایک روزہ کرکٹ ٹورنامنٹ 2017 میں روحیل نذیر نے 8 میچوں میں 67.67 کی اوسط سے 406 رنز بنائے۔ وکٹ کیپر بیٹسمین نے اسی سال انڈر 19 انٹرریجنل تین روزہ کرکٹ ٹورنامنٹ کے 5 میچوں میں 508 رنز بنائے۔4نصف سنچریاں اور 1 سنچری اسکور کرنے والے روحیل نذیر نے ایونٹ میں63.50 کی اوسط سے رنز اسکور کیے۔

دوہزار اٹھارہ میں فرسٹ کلاس ڈیبیو کرنے والے نوجوان وکٹ کیپربیٹسمین نے رواں سیزن میں قائداعظم ٹرافی کے فائنل سمیت 6 میچوں میں 320 رنز اسکور کیے۔وکٹ کیپر بیٹسمین ایچ بی ایل پی ایس ایل 2020 میں ملتان سلطانز کی نمائندگی کریں گے۔ وہ گذشتہ سال اسلام آباد یونائیٹڈ کے اسکواڈ کا حصہ تھے۔

پیٹرنز ٹرافی گریڈ ٹو، قومی ٹی ٹونٹی کپ اور قائداعظم ون ڈے کپ کھیلنے والے کپتان قومی انڈر 19 کرکٹ ٹیم کا کہنا ہےکہ ڈیبیوفرسٹ کلاس میچ میں سنچری اسکور کرنا ان کے کیرئیر کی بہترین اننگز ہے۔ انہوں نے گذشتہ سال قائداعظم ٹرافی میں اسلام آباد ریجن کی نمائندگی کرتے ہوئے ایچ بی ایل کے خلاف اپنے ڈیبیو میچ کی پہلی اننگز میں 130 رنز کی اننگز کھیلی تھی۔وکٹ کیپر بیٹسمین کی اننگز میں15 چوکے اور 1 چھکا شامل تھا۔

روحیل نذیر کا کہنا ہے کہ قومی کرکٹر عماد وسیم نے انہیں ہمیشہ اسپورٹ کیا ، دونوں کھلاڑیوں کا تعلق ایک ہی شہر سے ہے۔ انہوں نے کہا کہ عماد وسیم نہ صرف انہیں اہم ٹپس دیتے بلکہ عمدہ کارکردگی دکھانے پر ہمیشہ حوصلہ افزائی بھی کرتے ہیں۔

روحیل نذیر نے کہا کہ بین الاقوامی سطح پر ان کے پسندیدہ کرکٹر اے بی ڈویلیئرز ہیں اور وہ ان کی طرح آلراؤنڈ کارکردگی دکھانے کے خواہشمند ہیں۔انہوں نے کہاکہ قومی سطح پر احمد شہزاد ان کے آئیڈیل کرکٹر ہیں ۔ روحیل نذیر نے کہا کہ دوران بیٹنگ بک فٹ پنچ ان کا پسندیدہ اسٹروک ہے۔

وکٹ کیپر بیٹسمین اے سی سی یوتھ انڈر 19 ایشیا کپ 2017 اور 2018، آئی سی سی انڈر 19کرکٹ ورلڈکپ2018 اور اے سی سی ایمرجنگ کپ2019 میں پاکستان کی نمائندگی کرچکے ہیں۔ روحیل نذیر نےگذشتہ ماہ اے سی سی ایمرجنگ ایشیا کپ 2019 کےفائنل میں شاندار سنچری اسکور کرکے جیت میں کلیدی کردار ادا کیا تھا۔

روحیل نذیر کا کہنا ہےکہ وہ اس سے قبل بھی پاکستان کی جانب سےمیگا ایونٹ میں شرکت کرچکے ہیں۔ انہوں نےکہا کہ مختلف ایج گروپس کرکٹ میں گذشتہ دو سالوں سے بین الاقوامی سطح پر ملک کی نمائندگی کرنے کے باعث ان کے کھیل میں نکھار آیا ہے اور جنوبی افریقہ روانگی سے قبل وہ پراعتماد ہیں۔

روحیل نذیر نے کہا کہ آئی سی سی انڈر 19 کرکٹ ورلڈکپ 2020 کے لیے منتخب کردہ اسکواڈ میں ایسے کھلاڑی ہیں جو اس سے قبل بھی پاکستان انڈر 19 کرکٹ ٹیم کی نمائندگی کرچکے ہیں لہٰذا قومی اسکواڈ ایونٹ میں بہتر کھیل پیش کرے گا۔ انہوں نے کہا کہ ایونٹ کے دوران حیدر علی اور مجھ پر اہم ذمہ داری ہوگی جس پر پورا اترنے کی بھرپور کوشش کریں گے۔

اسکواڈ(یکم ستمبر 2000 یا اس کے بعد پیدا ہونے والے کھلاڑیوں کا انتخاب کیا جاسکتا تھا):

اوپنرز: عبدالواحد بنگلزئی (کوئٹہ)، حیدر علی (راولپنڈی) اور محمد شہزاد (ملتان)۔

مڈل آرڈرز: محمد حارث (پشاور)،محمد حریرہ (سیالکوٹ) اور محمد عرفان خان (لاہور)۔

وکٹ کیپر: روحیل نذیر(کپتان)۔

آلراؤنڈرز: عباس آفریدی( پشاور)، فہد منیر (لاہور)، قاسم اکرم (لاہور)۔

اسپنرز: عامر علی (لاڑکانہ) اور آرش علی خان (کراچی)۔

فاسٹ باؤلرز: عامر خان (پشاور)، محمد وسیم جونیئر (شمالی وزیرستان) اور طاہر حسین (ملتان)۔

ٹیم منیجمنٹ:

اعجاز احمد ( ہیڈ کوچ کم منیجر)، راؤ افتخار انجم (باؤلنگ کوچ)، عبدالمجید(اسسٹنٹ کوچ)، حافظ نعیم الرسول (فزیو تھراپسٹ)، صبور احمد (ٹرینر) ، عثمان ہاشمی( اینالسٹ) ،عماد حمید (میڈیا منیجر) اورکرنل (ر)عثمان رفعت انوری(سیکورٹی منیجر) ۔

شیڈول:

19جنوری 2020: پاکستان بمقابلہ اسکاٹ لینڈ
22جنوری 2020: پاکستان بمقابلہ زمباوے
24جنوری 2020: پاکستان بمقابلہ بنگلہ دیش
9فروری 2020: فائنل

Via PCB

More Cricket News

Wasim Akram Leads Pakistan’s NFT Revolution

Red Bull Campus Cricket to serve as Talent Hunt program for Peshawar Zalmi

پشاور زلمی اور رہڈبل مل کر ٹیلنٹ ہنٹ کریں گے

پشاور زلمی اور رہڈبل مل کر ٹیلنٹ ہنٹ کریں گے

PINK PAKISTAN LAUNCHES ITS FIRST EVER MOBILE APP IN PAKISTAN TO COMBAT BREAST CANCER

عالمی شہرت یافتہ کمنٹیٹرز ایچ بی ایل پی ایس ایل 2021 میں کمنٹری کریں گے